Bytes By Bhavin Random Words From The Factory Of My Thoughts!

27Dec/120

Holi

Jaane kiski yaadein laayi hai iss saal ki holi
Ki pichhkaari se nikli hai mere ashqon ki goli
"Aao Deva" woh kehti thi le kar gubbaaron ki fauj
Na pataa chala unme chhupa tha chhal aur pratishodh.

"Deva Deva" woh pukaarti aur rangon se nehlaati
Khokhlepan ke aanchal mein mujhko woh behlaati
Bada ajeeb sa tha uske holi ke jashn ka tyohaar
Jo fariyaad bhi na kar paayi mere aansuon ki bouchhaar.

Khoon bhare haathon se LAAL rang mujhe lagaayaa
Shaayad mera hi katl hua par mujhe na bataayaa
Pehle se hi the saanvle phir bhi lagaayaa KAALAA rang
Husn ki inn adaaon ne lagaa diya mujhpar kalank.

Ab bhi koi kasar baaki thi jo rang diya mujhe HARAA
Bin dekhe hi dikh gayi uski aankhon mein irshyaa
NEELE rang ka zeher milaa kar bhaang mujhe pilaati
"Main tumse pyaar karti hu, Deva" keh kar mujhe fuslaati

Maine puchha usse, "Mujh par PEELA rang nahi lagaayaa?"
Haathon mein woh thamaa gayi madiraa ka pyaalaa
Socha SAFED rang ki khwahish meri adhoori reh gayi
Kafan uphaar mein de kar woh kami bhi poori ho gayi

Chhal woh barsaaye jaa rahi thi aur main jhoomein jaa rahaa tha
Uske chhal ke gham mein main khushi se peeye jaa rahaa tha
Ab na kehna mujhe dost, "Aao Deva, chalo khele holi"
Darta hoon kahin chhut na jaaye in aankhon se ashqon ki goli!

27Dec/120

Maikhaane Chale Gaye

Ittefaq ki baat hai yaaron
Woh bin bole hi keh gaye
Alvida keh diya unhone
Aur hum maikhaane chale gaye..

Naukri ka thikaana na tha
Berozgaar hu reh gaye
Jaa na paye hum kahin or
Aur hum maikhane chale gaye..

Jhoothi tasalli jhoothe armaan
Woh jhooth viraasat mein de gaye
Hum kuch na kar paye yaaro
Aru hum maikhaane chale gaye..

Vaadon aur kasmo ka andaazaa kahaan
Doobte suraj ke saath woh bhi dhal gaye
Musaafir ban baithe zindagi bhar ke liye
Aur hum maikhaane chale gaye..

Kaisi dosti kaisa pyaar?
Sab apne hi chale gaye
Begaano ko talaashte kahaan
Aur hum maikhaane chale gaye..

Sharaab ke pyaale mein chuur hue
Fir bhi hosh naa uda sake
Socha behoshi ko dhundte kahaan
Aur hum maikhaane chale gaye..

Haath thaamaa tha zindagi ne
Rangeen dhokha diye chale gaye
Maut ki khoj karte kahaan
Aur hum maikhaane chale gaye..

Jab kafan naa mila udhaar par
Kabrastaan mein yun hi let gaye
Par laashon ne apnaayaa nahi
Aur hum maikhaane chale gaye..

27Dec/120

Ajeeb

Kaisa ajeeb sa rog hua hai mujhe
Jo mujhse thik nahi ho pata aaj
Yun toh guzar raha hai har pal khushi se
Phir bhi uski kami hai meri zindagi mein aaj..

Kitni ajeeb si kashish hain uski aankhon mein
Jo main uski or kheencha chalaa aata hoon aaj
Yun toh guzar raha hai har pal khushi se
Phir bhi uski kami hai meri zindagi mein aaj..

Jab iss dil mein use paa ne ki chaahat hi nahi
Toh kyun use khone ka darr hai iss dil ko aaj
Yun toh guzar raha hai har pal khushi se
Phir bhi uski kami hai meri zindagi mein aaj..

Kitne ajeeb se hai mereraaton ke sapney
Jo poore hote hai use dekhne ke baad
Yun toh guzar raha hai har pal khushi se
Phir bhi uski kami hai meri zindagi mein aaj..

Kaisa ajeeb sa rishta hai mera aur uska
Use dekhe bina mera dil udaas hai aaj
Yun toh guzar raha hai har pal khushi se
Phir bhi uski kami hai meri zindagi mein aaj..

26Dec/120

Ajnabee

Meri tarakki se jalte ho
Aur faqr bhi mehsus karte ho
Agar itna hi pyar hai mujhse
Kyun ajnabee bane firte ho?

Mujhe chot bhi dete ho
Chupke se aanso bhi bahaa lete ho
Agar itna hi pyar hai mujhse
Kyun ajnabee bane firte ho?

Chup rehne ko kehte ho
Meri khamoshi se bhi darte ho
Agar itna hi pyar hai mujhse
Kyun ajnabee bane firte ho?

Mujhse duur rehne ki kasme khaa kar
Meri khalish mein bhukhe pyaase rehte ho
Agar itna hi pyar hai mujhse
Kyun ajnabee bane firte ho?

Iss rishtey ka iqraar nai karte
Inkaar karne se bhi inkaar karte ho
Agar itna hi pyar hai mujhse
Kyun ajnabee bane firte ho?

Rutthne ka mauka bhi lete ho
Manaane ka bahaanaa dhund lete ho
Agar itna hi pyar hai mujhse
Kyun ajnabee bane firte ho?

Zindagi khushiyon se bharna chah kar bhi
Khud sehme sehme hue se rehte ho
Agar itna hi pyar hai mujhse
Kyun ajnabee bane firte ho?